Aujd’heuye ç'o diômoinche, lè Mélie d'hhé è s'n'homme : è maindi (è mèdi) l’ontio Gustave dévo lè tante Germaine vénant (ou vèront) mégé dévô nôs.

I m’en vaû bôtte queure ï mouhhé dé pouau hhu l’coin d’lé queuhhnère, té lé rèouètré dé temps en temps. y m'en vaû è lè mense, si lé sermon dure trôp longtemps, i n’sérâ mi rentraie pou maindi. (mèdi)

Auhhutaût Mélie pètchie, ouèlà lé Jouso, lé ouèsïn qu'airrive ouère Lé Diaude. è beuvant ène gôtte. Peu è vont ouère lâs bieux è l’écurie : ène gôtte...

èpré è vont ouère lè covaie dé pouau : éne gôtte... ïn caûp d’euil â gélînes : ècoi ène gôtte... Hhu bié qué nôs doux gaillards étïnt bié chauds è maindi (mèdi).

Ouèla lè Mélie qué r’vié dévô l’ontio peu sè fômme, el deuvaie l’auhh dé lè queuhhine qu’éta piène dé feumaie nare. Taüt dé suite Mélie réouète lè poquaisse dé châ.

Lé mouhé dé pouau o taût breula peu lé poquaisse foutue. Taût dé suite elle hheuche Diaude : Réwouète c’què té fâ ! On n’pieu ran té béillé è faire, té n'o qu'ïn gugusse, jeute bouen è bouère dâs gôttes, ïn sèqué queuhhnaie breûle jotte, té n'o ran di taût ! Mâs Mélie, i a réwouètié, i pieu mâme té dire qu'è maindi (mèdi) mouen l’quart, cè z'èkmensa jé dé feumâ. I a vu l’houre hhu l’heurlouge.

On n'on mi seuil cè qu'èls èvïnt mégé lé maindi (mèdi), hhûrement qué lè Mélie èré fâ queure ène andeuille...